— Një nënë ka ngritur shqetësime të rënda për kushtet shëndetësore në Klinikën e Pediatrisë në Qendrën Klinike Universitare të Kosovës (QKUK), ku djali i saj dyvjeçar u shtrua për trajtim pas simptomave të të vjelljeve dhe diarreje. Përmes një postimi në rrjetet sociale, ajo përshkruan një ambient ku higjiena është e munguar dhe privatësia është pothuajse inekzistente. Sipas dëshmisë së saj, shtrati ku u vendos fëmija kishte njolla të shumta që ajo i përshkruan si mbetje biologjike apo gjak. Ajo pretendon se spitali nuk kishte çarçafë të pastër, sapun apo faculeta, duke qenë e detyruar të marrë një çarçaf nga nëna e një pacienti tjetër me të cilin ndanin dhomën për shkak të mungesës së hapësirave. Kritikat e saj shtrihen edhe te infrastruktura sanitare, ku nënëja shkruan se tualeti në korridor është i hapur për të gjithë, pa asnjë derë. Ajo përshkruan hapësirat sanitare si vende me rroba të grumbulluara dhe vaskë të papërdorshme, duke deklaruar se higjiena në repart duket më shumë si një koncept teorik sesa një praktikë spitalore. Lidhur me pajisjet mjekësore, ajo vëren se shumë prej tyre mbahen bashkë me lidhëse plastike dhe improvizime, gjendje që ajo e krahason me një punëtori shtëpiake. Ajo thekson se muret janë të dëmtuara, ndërsa dyshekët e shtrateve janë të njollosur, duke i shoqëruar këto pretendime me fotografi që dëshmojnë gjendjen e rëndë të klinikës. Përveç kushteve materiale, nëna denon edhe komunikimin joprofesional të stafit. Ajo citon një infermiere që i kishte thënë se një nënë duhet të jetë e gatshme të qëndrojë gjithë natën ulur në një karrige për fëmijën e saj, gjë që reflekton një mungesë të konsideratës për prindërit që shoqërojnë pacientët. Procesi i largimit nga spitali është përshkruar gjithashtu si i koordinuar keq, ku vonesa në heqjen e kanilës së fëmijës kulminoi me një reagim të nervozuar nga stafi. Infermierja e ndërrimit, sipas saj, u përgjigj me arrogancë kur u kërkua ndihma, duke i kërkuar nënës pse nuk kishte komunikuar me stafin e mëparshëm. Në fund të reagimit, ajo përdor ironi duke referuar veprën e Dante Alighieri, duke sugjeruar se Ferri kishte vetëm nëntë rrathë sepse nuk e kishte vizituar Pediatrinë e QKUK-ut. Kjo denoncim vjen në një kohë kur kushtet e shëndetësisë mbeten një pikë problematike, ngjashëm siç ndodh me raste të tjera ku pacientët përfundojnë në QKUK në kushte problematike. _Burim:_ Lajmi.net _— Redaksia ZHURMA_

_ALPE —_ Trembëdhjetë vite pas aksidentit fatal me ski, familja e shtatë herë kampionit të botës në Formula 1, Michael Schumacher, jeton mes mungesës së përditshme dhe një force të përbashkët që gjen mbështetje te prania e tij, tregoi bashkëshortja Corinna në një dokumentar të ri kushtuar ish-pilotit. Ajo përshkroi aksidentin e 29 dhjetorit 2013 në Alpet franceze si 'fatin më të keq që mund të ketë një person në jetë', ndërsa privatësia mbetet parim themelor për familjen. 'Më mungon Michael çdo ditë. Por nuk jam vetëm unë,' tha Corinna. Sipas saj, mungesa ndihet edhe nga fëmijët e tyre, familja dhe babai i Michael-it. 'E megjithatë Michael është këtu. Ai është ndryshe, por është këtu. Dhe kjo na jep forcë,' shtoi ajo. Dokumentari sjell edhe kujtime nga jeta private e ish-pilotit të Ferrarit dhe Mercedesit, larg imazhit të ftohtë e të përqendruar që tifozët shihnin në pistë. Corinna rrëfeu se Michael ishte person shumë i dashur dhe plot humor në përditshmëri. 'Në festa, ai ishte gjithmonë i pari që vinte dhe i fundit që largohej. Ne qeshnim shumë. Ai nuk kishte zë për të kënduar, por gjithmonë këndonte "My Way", sepse i dinte të gjitha fjalët,' kujtoi ajo. Pavarësisht presionit të vazhdueshëm publik, familja Schumacher ka ruajtur heshtje të plotë mbi gjendjen shëndetësore të Michael-it. Sipas raportimeve, ai vazhdon të marrë kujdes të specializuar dhe terapi fizike, merr frymë vetë dhe ndjek trajtime të vazhdueshme rehabilitimi, ndërsa informacionet zyrtare mbeten shumë të kufizuara. Ndër vite kanë qarkulluar vetëm raportime dhe spekulime të pakonfirmuara, ndërsa familja ka kërkuar vazhdimisht respektimin e privatësisë. Rrëfimi i Corinnës mbetet një nga rastet e rralla publike të familjes, ndërsa gjendja shëndetësore e Michael-it vazhdon të jetë, si prej 13 vitesh, e paqartë dhe pa konfirmim zyrtar. _Burim:_ Top Channel _— Redaksia ZHURMA_

Në këtë emision u disktuan çështjet që lidhen me privatësinë. Të ftuarit, Krenare Sogojeva-Dermaku, Komisionere për Privatësi, dhe Kujtim Gashi, ish drejtor në ASHI, treguan metodat se si duhet të mbrohen të dhënat online, derisa shpjeguan në detaje se si dhe ku duhet të ankohen qytetarët kur shkelet privatësia e tyre.